National Covention shangut ai hte Constitution nga wa na hpe madi shadaw hkalum hpawng myitkyina hta galaw

Knet; September 30, 2007

September 29 ya shani Myitkyina mare kaba hta, Amyu Sha Mungbawng Zuphpawng (National Covention) hte Myen Mung kaw gaw da ai tara (Constitution) ningnan nga wa na hpe madi shadaw hkalum hpawng hpe galaw sai re.

Mare buga shara shagu hte jawng shagu na jawngma ni jahpawt 5:30Am hta tinang buga hte jawng ni hta gahkyin let zuphpawng hta Jinghpaw Mungdaw Uphkang Du, Du Kaba Ohn Myint a matsun aming hte maren n sa n mai sa du ra ai re lam, Zuphpawng hpe gaw Myitkyina mare kaba Mungshawa Ginsup Pa kaba hta hkying 8:00 Am hte 10:00 Am lapran galaw ai re lam hpe chye lu ai.

Zuphpawng hta Jinghpaw Mungdaw kata, Waimaw, Myitkyina, Putao, Monyin ginwang (4) kaw na buga mare masha hte Salang ni, simsa lam la tawn ai KIO asuya, NDA-K hte Lasang Awng Hpung ni, Myen mung asuya magam dap shagu na magam gun ni, jawng shagu na sara, sarama hte jawng ma ni sa du madi shadaw lawm ra ai re.

Sa du madi shadaw ai masha n gun yawng gaw marai 20000 daram re lam chye lu ai. Ndai zawn sa madi shadaw ai hta Myitkyina mare buga kata shanu nga ai mungshawa ni gaw dum n ta langai mi hta marai 1 hte 3 lapran sa ra ai nga nna Jinghpaw Mungdaw Uphkang Du, Du Kaba Ohn Myint a matsun aming hpe hkrit ai majaw sa du ai re lam chye lu ai.

Zuphpawng hta Amyu Sha Mungbawng Zuphpawng (National Convention) shangut ai hte Myen Mung kaw gaw da ai tara (Constitution) ningnan nga wa na hte seng nna Jinhpaw Mungdaw, Chyant Hkaing Ye nit Phwint Hpyoe Ye Atin(USDA) Waimaw Myo Ne A Tin, A Twin Ye Mu U Min Kyi , Myitkyina Dakkasu Jawng Up, Jinghpaw Mungdaw Amyu Shayi Hpung Shang Daw Soe Soe Htun , Mi Hkin nit Kalay Tsaunt Shaut Ye hpung shang Daw N-brang Doi Bu , Myen Asuya magam gun usa Bo Mu Aung Win, NDA-K hpung Ningbaw Kaba Zahkung Ting Ying hte KIO Datkasa Du Kaba Manam Tu Ja ni gaw, Asuya seng ang ai ni ka lajang tawn ai madi shadaw laika ni hpe sa hti dan madi shadaw lawm ma ai lam chye lu ai.

Ndai hpawng hta sa du lawm na matu Jinghpaw Mungdaw Uphkang Du, Du Kaba Ohn Myint kawn saw shaga ai majaw tinang KIO Ginjaw kaw nna Du Kaba Manam Tu Ja hte rau Du Kaba Kumje Seng Naw, Salang Kaba Hkawng Dai hte Du Jum Di Ram ni mung sa du dung lawm wa sai lam chye lu ai.

n sa n mai nga ai majaw sa du ra ai mung shawa, jawngma hte Asuya magam gun ni

Photo; Knet