Mungkan AIDS Masat Ninghtoi ( World AIDS Day) Mung Shawa Dap Shawa Zuphpawng galaw ai lam

Knet; December 1, 2007

Wunpawng Mungdan Shanglawt Hpung (KIO) Ginjaw Hkamja Dap kaw nna woi awn let, Wunpawng Mungdan Shanglawt Hpung (KIO) uphkang ginra Laiza Muklum hta AIDS Masat Ninghtoi (World AIDS Day) Mung Shawa Dap Shawa Zuphpawng hpe dai ni galaw wa sai lam chye lu ai.

Dai hpawt 5:00 am aten gaw Ginjaw Hkamja Dap a masing kata, Laiza Ramma Komiti ni woi awn let HU Kachin project ni hte rau ta gindun nna Maraton ( Kagat Shingjawng) ai lamang hpe galaw wa sai re. Kagat shingjawng ai lamang hta Mung shawa Dap shawa, Magam gun kaji kaba ni yawng marai 276 sa du shang lawm shingjawng ai lam chye lu ai. Kagat shingjawng ai hta asak 15 lawu ni Jahtu Kawng mare du hkra wa/sa kagat shingjawng ai lam, asak 15 ning a lahta La ni Laja Yang mare du hkra wa/ sa kagat shingjawng ai lam, Amyu Shayi ni Laja Yang mare du hkra wa/sa kagat shingjawng ai lamang ni hpe galaw wa sai rai nna, shagrau kumhpa hpe gaw masat 10 du hkra lata shagrau ai lam chye lu ai.

Lai wa sai November 29 ya shani hta mung Mungkan AIDS masat ninghtoi hpe la kap nna Laiza asuya lahta tsang jawngma, Lapran tsang jawngma ni a AIDS hte seng ai Ga shagawp shingjawng lamang, Hkarang Pan mahkret shingjawng lamang ni hpe galaw wa sai lam, shagrau kumhpa hpe masat 5 du hkra lata shagrau jaw mat wa ai lam chye lu ai.

Mung shawa Dap shawa zuphpawng hpe gaw dai hpawt hkying 11:00 Am aten kaw nna galaw hpang sai re. Shawng nnan zuphpawng tinyang up Du Kaba Hing Wawm kaw nna zuphpawng mahkyen hti ai hte hpawng hpaw sai lam n dau let hpawng hpang wa sai. Ginjaw Hkamja Dap Ningtau Lithkam Du Kaba Nhpan Naw Bu kaw nna “Mungkan AIDS Ninghkap gasat ai nhtoi hpe hkap la madi shadaw ai hku nna ndai hpang hpe galaw ai re lam, HIV/ AIDS ngu ai ana gaw kaning rai ai ana re, ganing rai kap chyam bra chye ai lam hpe masha hkum shagu yawng hkawn hkrang chye na wa lu na matu galaw ai re lam, bai nna ya ten Laiza kaw ndai ana hpe grau byin shangun ai gaw Ka-ni nanghpam htu lu htu sha ai masha law ai majaw hte Shawa Num law ai a majaw re, dai hpe yang ta gindun let gasat shamyit sa wa na matu hpaji jaw shatsam mungga jaw ai. Bai nna Yinjiang Hkamja Dap Ningtau Lithkam Mr.Wang Chi hte HU kaw na Mr. Hkawng Pang Yen ni kaw na mung sa du hpaji jaw mungga shaga ai. Dai hpang kagat shingjawng ai lamang, hkrang pan shingjawng ai lamang, Ga shagawp ka shingjawng ai lamang hta ningtawn ai shayi shadang ni hpe shagrau kumhpa jaw ya ngut ai hpang hpawng hpe hpungdim dat sai lam chye lu ai.

Ndai hpawng hta Amyu shayi hpung magam gun masha ni, magam dap makan dap shagu na magam gun ni, nawku makam masham hpung shagu na sara ni, HU kachin project kaw na magam gun ni, Mungshawa dap shawa yawng marai 200 jan sa du lawm ai lam chye lu ai.

Dai na hkying 7:30 pm aten hta mung Myulawt Wunli Gawknu hta Mungkan AIDS masat ninghtoi mahkawn yungwi shingjawng ai lamang hpe matut galaw sa mat wa na re lam chye lu ai.

Ginjaw Hkamja Dap Ningtau Lithkam Du Kaba Nhpan Naw Bu kaw na AIDS hte seng nna hpaji jaw mungga shaga nga yang

Yinjiang Hkamja Dap Ningtau Lithkam Mr. Wang Chi kaw na hpaji jaw mungga shaga nga yang