(60) ning hpring Jinghpaw Mungdaw nhtoi Manau Poi Kaba hpang sai

knet; January 5, 2008

60 ning hpring Jinghpaw Mungdaw nhtoi Manau Poi hpe dai ni kaw nna Jinghpaw Mungdaw, Myitkyina mare kaba, Shatapru Manau Wang hta galaw hpang sai lam chye lu ai.

Dai hpawt 5:00 Am aten Jinghpaw Mungdaw nhtoi Marathon Kagat shingjawng ai lamang, 7:30 Am aten Myitkyina mare hpawng chyawm hkristan hpung (MCC) woi awn let Manau Wang Chyinghka kaba hte Majoi Gawknu ni hta Manau Poi ting a matu ap nawng akyu hpyi ai lamang ni hpe galaw sai re.

Shana de daw gaw gat dut poi, ginsup shingjawng poi ni hpe matut galaw mat wa ai lam chye lu ai.

Matut nna ndai Manau Poi hta yungwi pinra, laili laika, hpan hkum sumhpa ginsup shingjawng poi lamang, gat dut poi lamang, (60) ning hpring Jinghpaw Mungdaw nhtoi manau poi tsawm shayi shadang shingjawng ai lamang ni hpe mung galaw sa mat wa na lam chye lu ai.

Ndai manau poi hta Jinghpaw Mungdaw kata Ginwang shagu na myitsu Du Salang hte Mungchying mungshawa ni, Uhpung shagu na myitsu Du Salang, magam gun kaji kaba ni, Myen mungdan ting shara shagu na Jinghpaw Wunpawng myu sha ni sa du lawm na hte sumtsan maigan buga shara shagu na manam ni mung hkum hkum ra ra sa du lawm na re lam chye lu ai.

Ndai zawn Jinghpaw Mungdaw nhtoi Manau Poi kaba hpe Myitkyina mare kaba, Shatapru manau wang hta galaw wa ai gaw (60) ning hpring Jinghpaw Mungdaw nhtoi Manau poi hte rai yang 15 lang re sai lam chye lu ai.