Australia Hkringmang Duju Kevin Rudd kaw nna Lagu La Kau hkrum ai ban ni hpang de tawngban ai ga

Knet; February 19, 2008

Daini na ninghtoi hta shinggyim masha labau hta sak galu dik htum htung lai dingsa ni hpe matut n di hkan sa hkrat wa ai ni rai nga ai ndai buga a rudi amyu masha ni hpe anhte ni shagrau ga ai .

Shanhte a ntsa lai wa sai ten ni hta shut hpyit tawt lai wa mat wa sai lam ni hpe bai nhtang sumru nga ga ai .

Grau nna gaw lagu la kau hkrum ai ban ni a ntsa shut hpyit lai mat wa sai lam ni hpe nhtang sawn yu nga saga ai - ndai lam gaw anhte a mungdan labau hpe aka kau ya lai wa ai daw kaba langai rai nga sai .

Mungdan a matu, prat laika man ningnan langai bai galam na aten du ra ai; lai wa sai ten hta shut hpyit tawt lai wa sai lam ni hpe sharai shading, shajaw sha-ang la ai hte Australia mungdan a labau hpe laika man ningnan de galam la nna shawng lam de gwi gwi hte lahkam sa wa na ten rai sai.

Mungdan Rapdaw nihte asuya ni langai a hpang langai masat jahkrat mat wa ai tara upadi ni hte masa lam yan ni a majaw anhte a Australia mungdan hta rau nga mungchying sha ni a ntsa maroi nni hpa sharung shayawt lam, nni nkri lam hte sum machyi ai lam ni byin pru shangun lai mat wa ai a majaw an hte tawngban ga ai,

Anhte grau nna tawngban mayu ai lam gaw Australia a rudi masha dingsa ni rai nga ai Abarijini hte Torres Straits Islanders myu masha ni kaw na ma ni hpe shanhte a dum nta masha, wuhpung wutsa hte nga shara buga ni kaw na woi la kau ya ai lam hte seng nna re.

Ndai lagu la kau hkrum ai ban ni a myit hkra machyi lam, shoichyum shoirang hkam mana chyum sha machyi hkrum lai wa ai lam ni hte shanhte a kashu kasha matu mara ni, shanhte jahka kau da ra ai dum nta masha ni yawng hpe mung anhte tawngban ga ai.

Shanhte ni a kanu ni hte kawa ni, kahpu kana kayung kajan nauna ni hpe mung dinghku masha, wuhpung wutsa ni hpe dumbrun dumbra jahka shabra ya lai wa ai a majaw tawngban ga ai .

Amyu hte htunghking a ntsa grai gumrawng shareng la chye ai a myu langai hpe sari sadang shagrit jahkrat, matsan chyaren shoihpa shoirang hkrum hkra shangun lai wa ga ai lam a majaw mung tawngban ga ai .

N dai tawngban ga gaw anhte a kraw lawang kata na pru wa ai ga nan re hte maren, dai hpe mungdan a ningma hkang daw chyen hpe shamai shatsai ya ai hku nna myit masin kraw lawang mahkra hte hkap la ya na matu Australia Mungdan a Rapdaw, anhte ni hkungga lara hte hpyi nem ga ai.

Ya gaw anhte a mungdan kaba a labau laika man ningnan hpe mai ka hpang nga sai, ngu myit makun let shawng lam a matu anhte n-gun dating da ga ai.

Daini anhte gaw labau hta nbyin lai mat wa sai lam ni hpe yin la ai lam galaw let Australia mungchying sha yawng a matu hkyawm ai shawng lam prat ningnan hpe madu lu na lahkam ningnan hpe lahkam hpang saga ai.

Ndai Rapdaw kaw nna myit shatawng da sai shawng lam prat ningnan dai hta gaw lai wa sai prat ni hta byin lai mat wa sai n tara ai hku dip rip ai mabyin ni prat hte prat galoi mung bai n byin kahtap shangun na sai .

Shawng lam prat ningnan dai hta gaw – Australia rudi masha ni mi da, rudi n re ai masha ni mi da yawng a myit dating da ai lam ni hpe makyit shabawn ai hte, an hte ni a lapran, mala hka shai hkat taw nga ai sak galu shadang, hpaji hparat hta awng dang lu ai lam, hte ngamu ngamai ja gumhpraw tam hkawm lu na ahkaw ahkang, ndai lam ni hta mala hka nga ai hpe shajup shagyip, bung pre mat wa lu na ga ai,

Shawng lam prat ningnan dai hta gaw ladat dingsa ni hte hparan jasan nlu ai mayak manghkang ginyan galu ni hpe ya mai byin wa sana rai nga ai lai ladat ningnan ni hpe tek manat let hparan sa wa lu na ga ai .

Shawng lam prat ningnan dai gaw kade nde shada hkungga lara hkat ai, kade nde na myit hkut dating ai hte kade nde na lit la ai lam ni hta ningpawt gaw de sana re,

Shawng lam prat ningnan dai hta Australia mungchying sha ni yawng gaw, ningpawt rudi gara kaw na mi rai rai, maren mara re rau bungli manang ni rai nna ahkaw ahkang maren mara lu ai hte, Australia ngu ai mungdan kaba ndai a labau daw kaba ningnan gaw shachyaw sa wa ai hta maren mara lit la, a kyu ara tek jum ai ni rai sana re.