Labau n'nan lu ka ai Shingni Hkrang

Knet; February 10, 2008

2008 ning February 9 ya shani Jinghpaw Mung Myitkyina mare ( Myo-Gong-Yawng ) sumla hkrung madun shara hta Jinghpaw Wunpawng shingni sumla hkrung labau hta shawng n'nan labau lu ka ai "Tsaw Myit Hpang ai Shara" sumla hkrung hpe madun lai sai lam chye lu ai.

Jahpawt hkying 10:00am aten hta ( Myo-Gong-Yawng ) sumla hkrung madun shara hta kyu hpyi let "Tsaw Myit Hpang ai Shara" sumla hkrung hpaw hpawng hpe galaw lai sai. Ndai sumla hkrung gaw Jinghpaw Wunpawng shingni sumla hkrung labau hta shawng n'nan Myen mung asuya a ahkaw ahkang (sin-za) lu ai sumla hkrung rai nna 1:34:15 minute tup galu ai DVD,VCD sumla hkrung re lam chye lu ai.

Ndai sumla hkrung a yaw shada lam gaw tsawm htap manu dan la ai Jinghpaw Wunpawng buga shara hte shingra tara ni hpe myen mung sha n'ga mungkan ting chye chyang wa hkra shingni hpaji hte htawn madun mayu ai lam, krin wa maw sai an hte a buga shagu na nam maling ni hpe hpaji jaw makawp maga lu na matu, Jinghpaw Wunpawng htung hkying dinghku de ai lam hte hpaji grai naw hpang hkrat nga ai anhte a bum ga shara shagu na ma ni hpe hpaji kung kyang nga sai a myu Wunpawng sha ni hpaji lam hta grai naw jawm shakut shaja jaw ra ai lam hpe shingni hpaji hte htawn madun mayu ai re lam "Tsaw Myit Hpang ai Shara" sumla hkrung Director Galau Zung Ki kaw nna tsun dan wa sai. Shi bai matut tsun ai hta shingni hpaji hte Jinghpaw Wunpawng amyu ni hpe mungkan ting chye chyang wa hkra, shingni hpaji hta a myu wunpawng shayi shadang ni rawt galu kaba wa hkra, shingni hpaji hte a myu wunpawng shada da kahkyin gumdin lam lu la hkra grai shakut shaja sa wa na re lam tsun lai sai.

"Tsaw Myit Hpang ai Shara" sumla hkrung hpaw hpawng hta saw shaga da ai myit su salang ni hte buga shawa masha 500 jan sa du n'gun jaw ma ai. February 22 ya shani kaw nna Myitkyina mare hte Wine Maw mare ni hta sumla hkrung madun hpang wa nna, Myen mung hta sha n'ga mungkan ting chyam bra nga ai Jinghpaw Wunpawng sha ni a lata de lu du hkra htuk shale sa wa na re lam chye lu ai. Ndai sumla hkrung gaw Galau Zing Ki a langai lang ngu na Director a tsam galaw madun da ai sumla hkrung re lam matut chye lu ai.

Director Galau Zung Ki hte hkrang shala shayi shadang ni

Director Galau Zung Ki hte shingni manaw manang ni

Director Galau Zung Ki hte Maran Seng Naw

Director L. Zau Ding mung sa du n'gun jaw

Hkrang shala shayi shadang ni hpe kabu gara shakram

Sa du n'gun jaw ai buga shawa masha

Sumla hkrung kata na

Sumla hkrung kata na