MUNGHPAWM GAWDIN NINGGANG LU WA AI, JINGHPAW MUNGDAW GAWDIN NINGHKRING NI HPE KIO KAW NNA HKAP TAU HKALUM

Knet; Februray 19, 2008

Ninghtoi; 2008 ning, February 15 ya shani 3:00 Pm aten KIO laksan uphkang ginra rai nga ai Laiza Muklum, Zup Awng Simsa Gawdin Ginsup Pa hta Mung Hpawm Gawdin Ninggang lu wa ai, Jinghpaw Mungdaw gawdin ninghkring ni hpe hkap tau hkalum hpawng galaw ai lam chye lu ai.

Tinang Wunpawng Mungdan Shanglawt Hpung (KIO) hte Laiza Mung Shawa, Dap Shawa ni kaw nna Munghpawm Gawdin Ninggang lu wa ai Jinghpaw Mungdaw gawdin ninghkring ni hpe nampan shang hkawng hkap gali jaw ai hte kabu gara hkap tau hkalum ai lamang hpe galaw wa sai re. Hkap tau hkalum hpawng hta Gawdin hpung ningbaw kaw nna sumtang tang madun ai lam, Ninggawn Daju Ginsup Komiti Ningbaw Lat Du Up Jum Du Kaba Pau Hkyi Zau Hpan kaw nna hkaptau hkalum mungga hte Zai Ninggaw Matsun Du, Du Up Jum Du Kaba Sumlut Gun Maw kaw nna Gawdin Ninghkring ni hpe shawng lam hta matut shakut sa wa na matu n'gun jaw mungga shaga ai lam, kumhpra shagrau sha-a ai lam ni hpe shaga lai wa sai.

Ndai gawdin ginsup hpung ni gaw lai wa sai January 15 kaw nna February 9 ya shani du hkra Lashio kaw ginsup wa sai re nna hpang jahtum Final poi hpe Sam Mung Dingdung gawdin ginsup hpung hte ginsup ai hta Jinghpaw Mungdaw Gawdin Hpung ni Goal 2-0 hte dang nna Munghpawm Gawdin Ninggang hpe lu la wa sai re lam chye lu ai.

Ndai Jinghpaw Mungdaw Gawdin Hpung hta tinang KIO, Ninggawn Daju Gawdin hpung na Gawdin ninghkring marai 15 tup lawm ai hte Munghpawm Gawdin ning gang hpe lu la na matu tinang KIO kaw nna 3 ning tup Ja Gumhpraw garum jaw ai lam nga wa sai lam, dai zawn garum ntum jaw ai hte tinang Ninggawn Daju ginsup hpung na gawdin ninghkring ni marai 15 lawm ai re majaw Munghpawm Gawdin Ninggang hpe tinang KIO de wa madun ai lam re hpe chye lu ai.

Jinghpaw Mungdaw gaw Munghpawm Gawdin Ninggang hpe lai wa sai 1968 ning hta kalang lu ai rai nna, ya dai ning 2008 ning hta kalang bai lu wa sai rai nga ai.

shagrau jaw ai kumhpa ni

Ginsup Hpung Ningbaw kaw nna sumtang tang madun nga yang

Lat Du Up Jum Du Kaba Pauhkyi Zau Hpan kaw nna hkalum mungga shaga nga yang

kumhpa hkap la nga yang

Jinghpaw Mungdaw Gawdin Ninghkring ni