Cyclone Nargis nbung laru tsin yam hkrum ai shara ni de Jinghpaw Wunpawng myu sha ni sa du garum  

Knet; May 25, 2008

Cyclone Nargis nbung laru tsing yam hkrum jam jau nga ai shara de Jinghpaw Wunpawng myu sha myit su salang ni hte Wunpawng ramma ni sa du karum ap nawng nga ai lam chye lu ai.

Tsing yam hkrum ai masha law malawng gaw Myen Hpung-ki jawng hte  Chyum sa sana jawng wang kata ni hta e shanu nga ai lam, tsin yam masha ni hpe Camp galaw ya let malu masha hte tsi mawan ni hpe mung karum jaw ya ai lam ni nga ai.

Laru hkrum nna mare kahtawng yawng mat mat ai mare yawng gaw 20 jan rai nga ai lam chye lu ai. Jinghpaw Wunpawng myu sha myit su ni kaw nna tsin yam masha ni hpe karum jaw ai hta n-gu, shapre hte jum ni hpe 24.5.2008 ya shani Hpya Pone mare e sa du karum jaw ya ai re lam Jinghpaw wunpawng ramma ni mung tinang lu ai n'gun a-tsam hte ya ten tsin yam hkrum masha ni hpe sa du ap nawng karum ya nga ai lam chye lu ai.

Mani na aten hta sha KIO uphkang ginra rai nga ai Laiza Muklum hta e jinghku htingbu Miwa Gumsan Mungdan e byin lai wa ai Nnang nawn kaba a majaw jam jau tsin yam hkrum ai masha ni hte Myen Mung kata e byin lai wa sai Cyclone Nargis nbung laru kaba a majaw ru yak jam jau tsin yam hkrum nga ai hpu nau ni a matu lak san karum alu jaw bang hpawng galaw sai lam, Pa Jau Bum hte Mai Ja Yang mare ni hta e 26.5.2008 hta dai zawn shawa daw tsa hte karum ningtum lahkawn shinggyin lam matut galaw na re lam, lahkawn la lu ai karum ningtum alu gumhpraw ni hpe Munghpawm Myen Mung Cyclone Nargis nbung laru tsin yam hte Miwa Gumsan Mungdan, Sichuan Mungdaw Nnang nawn tsin yam ni de maren hpra gam garan nna karum jaw na re lam hpe mung chye lu ai..

Ndai zawn tsin yam masha ni hpe Maigan NGO wuhpung ni kaw nna karum jaw ai lam, Maigan shara shagu kaw nna karum jaw ai lam ni nga sai re, raitim ya ten tsin yam hkrum masha ni gaw Yangon, Eyawaddy Gaiwang mare kaba ni hta grai naw jam jau hkrum nga ai, nga shara malu masha ni hta grai naw yak hkak jam jau hkrum nga ai lam tsin yam masha ni kaw na chye lu ai.

laru a majaw hten za nga ai nta

tsin yam hkrum masha ni nga shara

tsim yam hkrum masha ni