Wunpawng Mungdan Shanglawt Hpyen Dap, Hpyen Du Shalat Jawng, Masat Yan (2) Jawng Yu Poi Galaw

Knet; March 19, 2008

2008 ning March (19) ya shani Wunpawng Mungdan Shanglawt Hpyen Dap, Hpyen Du Shalat Jawng, Woi Chyai Bum hta Hpyen Du Shalat Jawng Masat Yan (2) Jawng Yu Poi hpe galaw ai lam chye lu ai.

Jahpawt hkying 7:00 Am aten hta Jawng Yu Hpyen Hprim galaw ai lam nga ai. Wunpawng Mungdan Shanglawt Hpyen Dap, Dap Awn Daju, Du Daju Gunhtang Gam Shawng kaw nna jawng yu ai jawngma ni hpe matsun maroi mungga shaga ai lam nga ai.

Jawng Yu Hpyen Hprim, kumhpa shagrau ai hta jawngma ningtawn kasi, Laili Laika Ningtawn kumhpa, Sinat gap ta ding lakawng kumhpa hte shaman shakyang ningtawn kumhpa ni hpe shagrau ya ai lam chye lu ai.

Dai hpang Jawng Yu Jawngma ni hpe Hpyen Du Shalat Jawng Masat Yan (3) Jawngma ni kaw nna hkungga jaw shakram ai hte Jawng Yu Hpyen Hprim hpe hpungdim dat sai re.

Jahpawt hkying 9:00 Am aten kaw nna Hpyen Du Shalat Jawng, Daru Magam Gawknu hta Hpyen Du n'nan ni hpe Wunpawng Mungdan Shanglawt Hpyen Dap hta Daru Magam Ahkang Aya ap ya ai hpawng hpe matut galaw mat wa ai lam chye lu ai.

Dai hpawng hta Wunpawng Mungdan Shanglawt Hpyen Dap, Tau Dap Awn Daju, Du Up Daju Hpunggan Zau Nan kaw nna mungga shaga ngut ai hpang Daru Magam Ahkang Aya ap ya ai Laika, Hpyen Du Ja, Du Hkawp Dazik ni hpe jaw ya sai.

Dai hpang Mungdan mahkawn hkawn ai hte Daru Magam Ahkang Aya ap ya ai hpawng hpe hpungdim dat sai re.

Shana de hkying 5:00 Pm aten shagrau sha-a shana shat jawm sha hpawng hta Wunpawng Mungdan Shanglawt Hpung (KIO) Ningbaw Kaba Lanyaw Zawng Hra hte Ginjaw Komiti Salang ni, Hpyen Du n'nan ni a Kanu Kawa ni, Laksan saw shaga tawn ai myit su Du Salang ni, makam masham hpung shagu na Sara ni, Hpyen Du n'nan ni a manhkrum lu sha hpawng hpe wu wu di di rai galaw sai.

Dai hpawng hta Ginjaw Masa Gat Hkai Dap, Sinpraw Majoi Htunghking Ka Manawt Hpung hte Laiza Ramma ni a Yungwi Pinra lamang, htunghking ka manawt ai lamang ni hpe galaw let Masat Yan (2) Hpyen Du Shalat Jawng Yu Poi lamang hpe hpungdim dat ngut kre la lu sai lam chye lu ai.