General Saw Bo Mya nnga mat ai lam yawn hkyen shiga

December 24, 2006
Kayin Amyu Sha Ningbaw, Ningbaw Kaba General Saw Bo Mya gaw 2006 ning December 24 ya shani Maesot Myo, Hpawaw Tsi Rung hta Jit Dwi ana, Salum ana ni hpe aten na na wa hkam sha lai wa sai rai nna, tsi tsi hkam nga ai laman hta sha n’nga mat wa sai re lam chye lu ai.

N’nga mat ai ten hta asak 79 ning rai nna, ngam ai Ningbaw kaba General Saw Bo Mya jan Sarama Naw La Hpo hte kasha yawng 7 re lam, bai nna shi a moi mang hpe Maesot Myo makau Hue Maing maga na shi a dum n’ta de la wa sai lam, makoi mayang hpawng hpe 26 ya shani galaw hkyen nga ai lam ni hpe chye lu ai.

Ningbaw Kaba General Saw Bo Mya gaw Kayin Rawt Malan nnan hpang ai kaw nna shang lawm gun hpai lawm wa sai rai nna ya du hkra laknak lang rawt malan ai hpe shaning 50 ning jan shanglawm gun hpai lai wa sai re lam chye lu ai.

Ningbaw Kaba General Saw Bo Mya gaw Hpa Pon Ginwang Kyauk Gyi mare kaba, Hti Mu Hki mare hta 1927 ning January (20) ya shani shangai ai rai nna, Kawa Saw Gae hte Kanu Naw Da Sae ni a kasha 12 nga ai kaw na No.10 madaw re lam chye lu ai.

Ndai zawn hpu nau Kayin Ningbaw Kaba General Saw Bo Mya nnga mat ai hte seng nna tinang Wunpawng Mungdan Shanglawt Hpung (KIO) Ginjaw Komiti kaw nna mung, KNU Ginjaw de yawn hkyen shiga shana sai lam hpe na chye lu ai.