KIO KAWN CHYEJU SHAKAWN HTE CHRISTMAS POI GALAW

Knet December 31, 2006

Nlung Ningnan Chyeju Shakawn hte Christmas Poi Lamang hpe Ninggawn Daju, Alen Bum, Hpungmai Gawknu hta 2006 ning, December (31) ya jahpawt hkying 11:00 AM kaw nna Wunpawng Mungdan Shanglawt Hpung kaw nna woi galaw ai lam hpe chye lu ai.

Ndai zawn galaw ai kyu hpyi lamang hta Ningbaw ningla ni, Hpu-awn kaji/kaba ni, Mung shawa ni, Wunpawng myusha ni yawng n chye ai sha shut kau ai mara ni hte chye nga ninglen shut shai ai kau ai mara ni hpe shangai wa sai Yesu Hkristu mara raw ya na matu, Wunpawng Mungdan Shanglawt Hpyen Dap kaw nna galaw ai yi sun hkauna ni kaw nna lu la ai nsi nai mam, dusat yam nga ni hpe Karai Kasang hpe hkungga jaw, chyeju dum shakawn ai lam hte Wunpawng Myusha ni a myit mada da ai Pandung de du lu na shaning rai u ga matut akyu hpyi ai lam chye lu ai.

Wa Jau Gawlu Gam kaw nna Karai Kasang a ja chyum mungga hpe htawn tsun ai lam na chye lu ai. Zuphpawng hpe Rev Gumsan Naw Ra shaman ya ai hte 12:20 PM hta Kyu Hpyi Hpawng hpe jahkring da ai lam, kyu hpyi ngut ai hte nlung ningnan lusha hpe jawm sha ai lam chye lu ai

Akyu hpyi lamang hta Nawku hpung shagu hta n-gun dat, a tsam dat galaw mat wa ai, Wa Jau ni, Hpung Woi Hpung Up ni, sara saranum hte ramma ni hpe kumhpa shagrau jaw shatsam mat wa ai lam chye lu ai.

Du Kaba Shadau Awng Myat woi awn nna galaw ai Hpyen Dap hkauna hta dang 3,000 jan lu ai hte Lwidwi si grai lu la ai lam ni hpe mung chye lu ai. Dai yi kaw nna pru ai nsi nai mam, yam nga ni hpe mung ndai akyu hpyi hpawng hta alu bang, jai lang ai lam ni hpe mung chye lu ai.

Ndai kyu hpyi hpawng hta Wunpawng Mungdan Shanglawt Hpung Ningbaw Kaba Lanyaw Zawng Hra, Tingnyang Up Malai Lt. Genereal Gauri Zau Seng, Ningbaw Malai Lt. Genereal Nban La, Wunpawng Mungdan Shanglawt Hpyen Dap Dap Awn Daju General Gunhtang Gam Shawng, Tau Dap Awn Daju Brigadier Hpunggan Zau Nan hte Ginjaw Komiti salang ni, Magam Dap Ginjaw Rung na Magam Dap Lit Hkam ni hte hpu-awn kaji kaba, Dap shawa hte Mung shawa masha yawng marai 1,000 mi jan sa du ai lam chye lu ai.

Daina 2006 ning, December (31) ya hkying 00:00 ten hta Mung Ninggawn Daju, Hpungmai Gawknu hta e 2007 Shaning Ningnan hpe kap tau la ai akyu hpyi lamang galaw na re ai lam hpe mung chye lu ai.

Sa du ai Hpung Sara ni

Sa du ai KIO Ginjaw Komiti Salang nkau mi

Senhkum hte chyeju shakawn nga yang

Sadu shang lawm ai mung shawa ni

KNET.