Laiza Muklum Hta, Wa Jau Nbwi Naw A Jau Tai Ai (25) Ning Hpring Jubi Lee Hte Namsan Yang Jau Ginwang Ginlung Christmas Poi Galaw

Knet; 25 December 2006

Manmaw Ginwang, Laiza Muklum Cahtolic Nawku Jawng hta, 1981 ning May shata 17 ya shani kaw na Wa Jau aya hpe hkam la let hpung magam gun hpang wa sai Wa Jau Joseph Nbwi Naw a Jau tai ai (25) ning hpring Jubi Lee hte Namsan Yang Jau Ginwang Ginlung Christmas poi hpe dai ni galaw ai lam chye lu ai.

Shawng nnan poi komiti ningbaw Du Kaba Nhpan Naw Bu hkaptau hkalum mungga shaga ngut ai hpang, Wajau Gaw Lu Gam kaw nna hpawng hpaw kyu hpyi ya ai hte ndai hpawng hpe hpang sai. Dai hpang Manmaw Ginwang Up Saradaw Raymond Sumlut Gam chyeju dum mungga shaga ai. Bai nna Wa Jau Nbwi a Jau tai ai (25) ning hpring Jubi Lee hte Namsan Yang Jau Ginwang ting a matu Sara Lasang Tu San kaw na hkum tsup kyu hpyi ya ai, bai nna Laiza Muklum ramma ni kawn Jau tai ai (25) ning hpring sai Wa Jau Nbwi Naw hpe chyeju dum mahkawn hte shagrau sha-a ai lam nga ai.

Dai hpang Manmaw Ginwang Up Saradaw Raymond Sumlut Gam, Jau tai ai (25) ning hpring sai Wa Jau Nbwi Naw, Wa Jau Nbwi a Chyinghkai Kanu Mahta Palai Kaw, Wunpawng Mungdan Shanglawt Hpung Kongsi Ningbaw Kaba Lanyaw Zawng Hra hte Ginjaw Salang ni, Nawng E Hku Buga Hkalup Hpung hte Laiza Muklum Buga Hkalup Hpung ni hpe Namsan Yang Jau Ginwang kaw nna htunghking magun lit hte shagrau ai lam ni nga ai.

Matut nna Joseph Wa Jau Nbwi Naw hpe (25) ning hpring Gumhpaw Jubi Lee kumhpa hte lak san kumhpa ni hpe shagrau ya ai. Ndai kumhpa hpe Wa Jau Nbwi Naw a makin jinghku, kanu kawa ni a gawng malai langai mi shagrau ya ai rai nna Wa Jau Nbwi a labau kadun hpe mung ga shagawp hte hti dan ai lam chye lu ai.

Ndai hta Wunpawng Mungdan Shanglawt Kongsi Ningbaw Kaba Lanyaw Zawng Hra hte Ginjaw Salang ni, Manmaw Ginwang Saradaw Raymond Sumlut Gam hte Wa Jau, Ma Ma ni, Namsan Yang Jau Ginwang na Wa Jau, Ma Ma ni hte nawku hpung masha ni, ni nawn ai mare buga na nawku hpung masha ni yawng rai yang marai 500 daram sa du chyeju shakawn lawm ai lam hpe chye lu ai.

Ndai hpawng ngut ai hpang sa du chyeju shakawn ai ni yawng man hkrum lu sha hpe jawm sha nna, shana hkying 6:00 Pm aten hta mung Yu Ngwi Pinra hpe matut galaw mat wa na re lam chye lu ai.

Dai ni na nhtoi hta sha Laiza Muklum, Laiza Buga Hkalup Hpung Nawku Jawng hta Hpungtau Maran Naw a 1981 December kaw nna, 2006 December du hkra Hpungtau magam gun ai (25) ning hpring chyeju shakawn hpawng hpe mung galaw ai lam chye lu ai.

Kanu Mahta Palai Kaw hte dung nga ai Wa Jau Nbwi Naw

Wa Jau Nbwi Naw, Magun Lit hpe hkap la nga yang

Wa Jau Nbwi Naw a Kanu Mahta Palai Kaw kaw nna Magun Lit hpe hkap la nga yang

Sa du chyeju shakawn lawm ai KIO Salang ni hte Nawku hpung masha ni