SINPRAW GINWANG GINJAW HTA (6) LANG NA JAWNGMA WUNZUP GINSUP POI GALAW

Knet

December 4,2006

2006 ning December praw 4 kawn 17 ya shani du hkra Sinpraw Ginwang Ginjaw, Mai Ja Yang Lahta Tsang jawng wang hta Sinpraw Ginwang Ginjaw a (6) lang na Jawngma Wunzup Ginsup Poi galaw ai lam chye lu ai.

2006 ning December praw (4) ya jahpawt ( 10:00 )AM hta Sinpraw Ginwang Ginjaw, Mai Ja Yang Muklum Lahta Tsang Jawng wang e hpaw poi lamang hpe galaw sa wa ai lam chye lu ai.

Dai hpaw poi lamang hta shang lawm ai jawngma ginsup hpung ni dinggren yan shang wa nhtawm ginsup pa de shara la ai lam shawng galaw ma ai.

Ndai ginsup hpaw poi pan gran hpe Ginjaw Hpaji dap Lit hkam Sara kaba Sumlut Gam hte Ginsup Poi Komiti Ningbaw hku nna rep di ya let hpawng hpe hpaw hpang sai. Dai hpang Hpawng hpa-awn kawn hpawng mahkyen hti nhtawm, Myu sha Dawng hkawn hpe hkungga jaw nna Ginsup Poi Komiti Ningbaw kaw nna hpawng hpaw mungga shaga lai wa sai. Ginjaw Hpaji Dap Lithkam kawn Wunzup Ginsup poi mungga shaga ai lam chye lu ai. Poi Komiti Ningbaw kawn poi wang tara hti shana let, hpawng hpungdim dat mungga hpe shaga la nhtawm, ginsup hpung ni yawng ga shaka hkam la ai lam galaw sai. Ginsup hpung hte hpung Ginjaw Hpaji Dap Lithkam hpe hkawm gawai hkungga jaw ai lam galaw sai. Mai ja yang Jawngma ni a PT ka hkrang hte Sara Hpaji sharin jawngma ni a Aerobic ka hkrang madun ngut nhtawm, shingjawng na ginsup hpung ni hpe Ginjaw Hpaji Dap Lithkam Sara kaba Sumlut Gam kawn Gawdin htawng bang ya ai hte Ginsup poi hpaw hpang wa sai lam chye lu ai.

Ndai ginsup poi hta sa du shang lawm ai jawngma yawng 459, ginsup woi awn ai sara ,saranum ni- 79, komiti malawm ni marai 41, Aerobic hpung marai 64 rai nna, Ginsup Hpung yawng (17) hte ginsup hpan myu (16) re ai lam chye lu ai. Ndai ginsup hpaw poi hta mung shawa, dap shawa wu wu di di rai sa du ngun jaw ai lam chye lu ai.

Ginsup hpung ni ginsup wang de dinggren yan shang wa nga yang

Ginsup hpung ni shara la nga yang

Ginjaw Hpaji Dap Lithkam Sara kaba Sumlut Gam kawn mungga shaga nga yang

Ginjaw Hpaji Dap Lithkam hpe hkawm gawai hkungga jaw nga yang

Ginjaw Hpaji Dap Lithkam kawn hpawng hpaw gawdin htawng bang nga yang

Shing jawng nga ai gawdin hpung

Photos by Hpung San