KACHINNET

Sinpraw Majoi Manau htingnu hting shawn shang hte 45 ning hpring 46 lang na rawt malan poi (4-2-2006)

Knet

Laiza; 2006 ning February shata praw 4 ya shani Laiza Muklum hta galaw nga ai Sinpraw Majoi manau htingnu hting shawn shang hte 45 ning hpring 46 lang na rawt malan poi hpe jahpawt hkying 7:00 AM aten shadip lung majai lamang galaw nna Nau Ra Pa pan grang rep lamang hpe galaw la lu sai hpe chye lu ai.

Ndai Sinpraw Majoi nau ra pa pan grang rep lamang hta Wunpawng mungdan buga ginra shagu na masha ni hte Wunpawng Mungdan kata hta shanu nga ai kaga Amyu baw sang ni mung gabu gara hkum hkum tsup tsup rai sa du ma ai. Nau ra pa pan grang rep na matu Wunpawng Mungdan a kanu kawa rai nga ai Salang Lamung Tu Jai(KIC, Ningbaw kaba), Salang Lanyaw Zawng Hra(KIO Ting nyang Up Malai-1), Salang Gauri Zau Seng (KIC Ningbaw Malai-1), Salang Yup Zau Hkawng (Ningbaw, Wunpawng Htung Hking Hpung Ginjaw), Rev.Lai Maw Gam, Du Wa Yi Ma Yaw(Wunpawng Htung Hking Salang), Du Wa Wa Sha Kum Ja (or) Du Wa Ding Ra Ah Hpung (WMR), Hpawmi Nahpaw Kaw Mai(Ningbaw, Amyu Shayi Hpung Ginjaw)ni, Wa Jau Nbwi Naw kaw na akyu hpyi shaman dat ya ai hte rau pan grang rep di let wan pan gap nna kabu gara hte Naura pa hpe hpaw dat sai.

De hpang hkying 8:00 kaw nna Nau Baw manau nau ma ai. Dai manau nau ai hta Wunpawng Mungdan Shanglawt Hpung Ningbaw Kaba Lamung Tu Jai kawn Ginjaw Salang ni hpe woi let ngwi pyaw ai hte manau nau la lu sai. Ndai nau baw manau hta amyu baw sang shagu na htung hkying hpung ni hte jinghku mungdan na hpu nau ni mung wu wu di di sa shang lawm ai hpe chye lu ai.

Nau Baw manau nau ngut ai hpang hkying 10:00 Am hta Gang bang (Groung Show) lamang hpe bai matut galaw ai lam hpe chye lu ai. Ndai Gang bang Madun lamang hpe Shanglawt Masa Gat Hkai Dap kaw nna, Wunpawng Ginru Ginsa Labau hkrang shala madun dan ma ai, matut nna Manmaw na Miwa Htunghkring hpung kaw nna Baren ka hkrang hte atsam madun dan ma ai.

Bai nna hkying 10:30 aten hta sinpraw majoi manau wang hta poi shabyin shatai komiti kawn hting shawn shang mungga shaga na lamang bai matut galw mat wa ai. Dai hting shawn shang mungga hpe Dap Awn Daju Du Kaba Gunhtang Gam Shawng kaw nna hting shawn mungga shaga ya ai, de hpang Bo Mu Chuk San Htun kaw nna hting shawn shang mungga bai shaga ya ai.

De hpang hkying 11:30 Am aten hta jahpawt daw de rai nlu manau shi ai shawa masha ni a matu shawa manau hku nna shawa manau nau ma ai. Ndai manau hta buga shagu na nu wa hpu nau myit su ni kabu gara hte manau nau la lu sai.

Shana maga hkying 2:30 aten hta Sinpraw majoi gawk nu hta Sinpraw Majoi manau htingnu htingshawn lu sha hpawng hpe galaw ma ai, ndai lu sha hpawng hta Ningbaw Kaba hte kaga Ginjaw Salang ni hkum hkum tsup tsup sa du nna Hpu nau NDA-K, Du Kaba La Sang Awng hte Lahta Tsang Mung Shawa Hpung ni, Sut Du Lawa Zawng Hkawng ni mung a lum ala rai sa du shang lawm ma ai. Ndai lu sha hpawng hta Myitkyina mare kaba na yu-ngwi ning hkring ni sa du shalum shangwi shapyaw ya ai hpe chye lu ai. Shana daw hkying 4:00 aten hta shawa manau kalang bai nau nna shani na lamang hpe hpung dim dat ma ai.

Shana na lamang 6:00 aten, Sinpraw Majoi manau wang hta Maigan jawng yu Wunpawng Ningja (W.N.J)Htunghking Hpung a ka hkrang, shara shagu na htung hking ka manawt hte mying gum hkawng ai W.P yu ngwi ning hkring shayi shadang sha ni a yu ngwi hte shangwi shapyaw ai lam chye lu ai.