2004 ning May shata praw (3) ya hte (4) ya shani KIO hte NDAK Ginjaw lahkawng de na ningbaw ningla myit su ni hkum zup ai zuphpawng hta jawm myit hkrum zup ai zuphpawng hta jawm myit hkrum da sai lam ni. (MoU)

1. Wunpawng amyu masha ni hte Wunpawng mungdaw ngwi pyaw galu kaba rawt jat wa na matu      simsa lam hpe n-hten n-run ai sha galoi mung ngang grin nga hkra jawm makawp maga na.
2. Wunpawng amyu sha ni hte Wunpawng mungdaw a akyu ara hpe atsam tup myit mang hkrum let      galaw gunhpai sa wa na.
3. 17.5.2004 ya shani bai matut galaw sa wa na rai nga ai National Convention awng dang hkra sa      lawm nna Wunpawng amyu sha ni lu ang ai ahkaw ahkang hpe lu la hkra dai National Convention      hta da kring da lang n-gun dat sa tsun bawngban lawm na. Ndai lam ni hte seng nna Wunpawng      shawa masha ni chye na hkra mung KCA kaw nna woi awn n htawm buga ginra ni de hkan hkaw      tsun dan ai hte hpaji hkan hpyi la ai lam hpe galaw na.
4. Wunpawng amyu sha ni hte Wunpawng buga ginra shara shagu kani hte nang hpam tsi mawan ni      tsep kawp hkoi tsai mat wa hkra jawm pat jasan mat wa na. Nang hpam kani a malai akyu rawng      ai n-si nai si amyu myu hpe galai hkai shatut ai lam hpe n-gun dat galaw sa wa na.
5. KIO hte KIA hpunau hpung lahkawng gaw ni kahtep hkat ai byga shara ni hta gaw sharawt bawng     ring bungli ni galaw sa wa ai shaloi galoi mung shada da shada da shana hkat, bawngban jahkrup     hkat nna galaw sa wa na.
6. N-mai hku (Hkawng Lang Hpu) ginra hte Sadung ginra ni hta ya aten byin nga ai lam ni, nchye na     hkat ai sat lawat ni hte seng nna KCA woi awn n htawm KIO hte NDAK hpunau hpung lahkawng     shada da bawngban jahkrup sharai hkat nna bungli galaw sa wa na.
7. KIO hte NDAK hpunau hpung lahkawng myit mang hkrum ai lam hpe hkrang shapraw ai hku nna     buga gaw sharawt bungli mi rai rai, sut lu hpaga yumga lam rai rai jawm galung galaw mai ai bungli     ni hpe jawm pawng galaw sa wa na.
8. Wunpawng amyu sha ni myit hkrum gahkyin gumdin ai hte shawng lam de lahkam sa wa lu na matu     lai sai majan aten hta mung tsaw myu tsaw masa a majaw shada shut hkat ai lam ni, n-ngwi n-pyaw     ai lam ni ma hkra hpe shada da mara dat hkat aming General Amnesty Order shapraw ya na ra na     re.