LANGAI LANG NAWUNPAWNG AMYU SHA MUNGBAWNG ZUPHPAWNG NDAU SHABRA LAIKA.

1. 2002 ning, October shata ( 21 ) ya kaw nna, ( 25 ) ya du hkra, Laiza mare e, KIO hte NDAK Ginjaw Kaba lahkawng woi awn ai hte buga ginra shara shagu na du sa ai Wunpawng Mung shawa myit su du salang ni, Wunpawng Amyu Sha Mungbawng Zuphpawng Kaba galaw nna, “Wunpawng Amyu Sha Mungbawng Rapdaw” hpe hpaw ning htan da lu sai.

2. Munghpawm Myanmar Mungdan Na Ya Ka ( SPDC ) Asya hte mungchying sha simsa hpung ni a, mungdan simsa ngwi pyaw lam galaw shakut shaja nga ai hpe Wunpawng mung shawa e hkap tau madi shadaw nga ga ai. Munghpawm Myanmar Mungdan ting tut nawng ngang grin ai simsa lam lu la hkra shakut sa wa na matu ndai zuphpawng kaba kaw nna daw dan sai.

3. Tara rap ra ai hta madung tawn ai Munghpawm Mungdan gaw de sa wa na lam, Munghpawm Mungdan ngang grin nga na lam hte mungchying shani yawng myit hkrum mang rum wa na lam hpe myit shatawng let, atsam mahkra hte shakut shaja sa wa na ga ai.

4. Na Ya Ka ( SPDC ) Asuya hte mungchying sha simsa hpung ni jawm galaw nga ai Ka-ni nang hpam malu masha hpe gasat shamyit ai magam gaw, amyu sha yawng a magam lit re ai ngu, hkam la ga ai. Dai majaw, Ka-ni nang hpam malu masha tsai mat hkra galaw sa wa ai magam hta mung shawa yawng lahkrip ra ra n gun dat shang lawm na matu saw lajin dat ga ai.

5. Mung masha ni myit mada ala nga ai Democracy mungdan gaw gap na hte mungdan gaw da tara ka lajang na aten grai hpang hkrat mat wa nga ai. Dai majaw, Na Ya Ka ( SPDC ) Asuya woi awn ai hte, mung masa hpung ni, mungchying sha dat kasa ni, mungchying sha simsa hpung ni, mung shawa tsang shagu na dat kasa ni, hkum hkum tsup tsup shang lawm ai amyu sha zuphpawng kaba hpe alawan tin tin galaw nna, jet ai munghpawm mungdan gawda tara lawan ngut hkra ka lajang na matu hpyi lajin dat ga ai.

6. Lahta na yaw shada ai lam ni awng dang hkra galaw sa wa na matu, ndai langai lang ngu na Wunpawng Amyu Sha Mungbawng Zuphpawng Kaba kaw nna myit hkrum kahkying gumdin ai hte “Wunpawng Amyu Sha Mungbawng Rapdaw” hpe lit shatsam dat ga ai rai.

2002 ning, October shata ( 25 ) ya.
Laiza Mare.