MUNGHPAWM MYANMAR MUNGDAN HPYENDAP ASUYA A MUNG MASA MASING ( ROAD MAP ) A NTSA WUNPAWNG AMYU SHA MUNGBAWNG RAPDAW A NDAU SHABRA LAIKA. Munghpawm Myanmar Mungdan Hpyendap Asuya Hkring Mang Daju kaw nna, 2003 ning, August shata ( 30 ) ya shani mungdan de tara shang ndau dat ai. Mung masa masing ( Road Map ) a ntsa, Wunpawng Amyu Sha Mungbawng Rapdaw a mu mada, hkam la ai lam hpe, Sindun Wunpawng Amyu Sha n lang hte, Wunpawng Mungdaw kata shanu nga pra nga ai, rau dung rau nga, mungchying mung shawa daw tsa de, shana shabra dat ga ai. Mungdan Hpyendap Daju Hkring Mang Daju kaw nna, Mungdan de tara shang ndau shabra dat ai, Mung masa masing ( Road Map ) hpe sung sung li li, sawn maram dinglik, jen ginhka dat yu ai shaloi, Panglung myit jasat hte maren Party hkum democracy masa hpe hkan sa ai, jet n na, tara rap ra ai, Munghpawm Myanmar Mungdan gaw de sa wa na matu lagaw lahkam hpang wa ai mung masa masing rai na re ngu kam ai a jaw e, dai masa masing hpe Wunpawng Amyu Sha Mungbawng Rapdaw hku nna masa hku hkap tau la ai. Mungdan Asuya kaw nna ndau shabra tawn ai Mung masa masing ( Road Map) a shawng ning nan na ninggam gaw, Amyu Sha Mungbawng Zuphpawng kaba ( N.C ) galaw na ngu ai rai nga ai. Dai zuphpawng kaba gaw, mung shawa ni ra sharawng nga ai, jet nna tara rap ra ai, Munghpawm Myanmar Mungdan gaw de sa wa na matu dat kasa ni yawng n dut n dang kraw hpaw bawngban jahkrup lu ai zuphpawng rai na re ngu kam ai a jaw e, Wunpawng Amyu Sha yawng a malai dat kasa ni hpe saw shaga wa yang, dat kasa ni ahkrum ara shang lawm sa wa na matu, Wunpawng Amyu Sha Mungbawng Rapdaw hku nna madi shadaw n gun jaw sa wa na ga ai.
|